කැලිෆෝනියාවේ වෙසෙන 70 හැවිරිදි එඩ්වින් හාඩ්මන් දශක දෙකක් තිස්සේ රවුන්ඩ්අප් වල්නාශකය සිය වගාවන් සදහා භාවිත කර ඇති අතර ඔහු non-Hodgkin’s lymphoma පිළිකා රෝගයෙන් පීඩා විදියි.

සැන්ෆ්‍රැන්සිස්කෝ අධිකරණය තීන්දු කළේ ඔහුගේ පිළිකාවට රවුන්ඩ්අප් වල්නාශකයේ ග්ලයිෆොසේට් ‘සැළකිය යුතු හේතුවක්’ වී ඇති බවයි.

මීට පෙර ඩිවෙයින් ජොන්සන් නමැත්තා ද මොන්සැන්ටෝ සමාගමට එරෙහිව නඩු පැවරීමෙන් ඩොලර් මිලියන 289ක වන්දි මුදලකට අධිකරණ තීන්දුවක් ප්‍රකාශයට පත්වුවද එම සමාගමේ කූඨ ක්‍රියාකලාපය හේතුවෙන් එම වන්දි මුදල ඩොලර් මිලියන 78.5කට සීමා කිරීමට නීතිමය කටයුතු කෙරිණි.

මෙම පුද්ගලයාට ද එවැනි වන්දි මුදලක් අධිකරණය මගින් තීන්දු කරනු ඇත යන්න ඇතැමුන්ගේ අදහසයි.

කෙසේවෙතත් මෙවැනිම නඩු 4000කට වැඩ සංඛ්‍යාවක් මොන්සැන්ටෝ සමාගමට එරෙහිව නඩු ලැයිස්තුවේ පවතින බව විදෙස් වාර්තා පවසයි.

ශ්‍රී ලංකාවේ ද ග්ලයිෆෝසේට් ආනයන 2015 දී තහනමට ලක්කෙරුණ ද තේ සහ රබර්වලට හැර සෙසු වගාවන්ට භාවිත කිරීම සදහා යළි 2018 දී තහනම ඉවත් කරන ලදී.

ඒ අනුව අමෙරිකාවේ සිට, යුරෝපය, ආර්ජන්ටිනාව, බ්‍රසීලය, කොලොම්බියාව, එල් සැල්වදෝර් මෙන්ම ශ්‍රී ලංකාවේද ග්ලයිෆොසේට් අභියෝගයට ලක්ව සිටියි.

කෙසේවෙතත් මොන්සැන්ටෝ සමාගමේ මව් සමාගම වන බේයර් සමාගම තවමත් පවසන්නේ රවුන්ඩ්අප් නිෂ්පාදනයේ ප්‍රධානතම අමුද්‍රව්‍ය වන ග්ලයිෆොසේට් උපදෙස් අනුව භාවිත කරන්නේ නම් ආරක්ෂිත බවයි.

මේ වනවිට අධ්‍යයන වාර්තා 800ක් පමණ ඒ පිළිබද තහවුරු කර ඇති බව ද කෙලෙස හෝ එහි ආරක්ෂිත බව අධිකරණය හමුවේ තහවුරු කරන බව ද බේයර් සමාගම අවධාරණය කර සිටියි.