ප්‍රබෝධා හෙට්ටිආරච්චි
ගාල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වෙන ශ්‍රී ලංකාව සහ බටහිර ඉන්දීය කොදෙව් අතර වන පළමු ටෙස්ට් තරගයේ සිවුවැනි දිනය වන අද (24) සිට ක්‍රීඩාංගණයට පැමිණ තරගය නැරඹීමේ අවස්ථාව ප්‍රේක්‍ෂයන්ට හිමිවන බව ශ්‍රී ලංකා ක්‍රිකට් ආයතනයේ සභාපති ශම්මි සිල්වා මහතා පැවසීය.
ක්‍රීඩාංගණයේ ප්රේක්ෂකයන්ට වෙන්කර ඇති ඉඩ ප්‍රමාණයෙන් සියයට 35 ක ප්‍රමාණයකට ප්‍රේක්‍ෂකයන් ඇතුළු කරගන්නා බවත් ප්රේක්ෂකයන්ට නොමිලයේ තරග නැරඹීමේ අවස්ථාව ලැබෙන බවත් සභාපතිවරයා කීය.
සියලු සෞඛ්‍ය මාර්ගෝපදේශයන්ට යටත්ව මෙම පියවර ගන්නා අතර එම අවස්ථාව ක්‍රිකට්ලෝලීන්ට ලැබීම පිළිබඳ සතුටට පත්වන බව ක්‍රීඩා අමාත්‍ය නාමල් රාජපක්ෂ මහතා පැවසීය.
සෞඛ්‍ය අමාත්‍ය කෙහෙළිය රඹුක්වැල්ල මහතා කියාසිටියේ මෙම අවස්ථාව නිවැරදිව සෞඛ්‍යාරක්ෂිතව භාවිත කිරීම තුළින් ක්‍රිකට්ලෝලීන්ට ආරක්ෂිතව විනෝද විය හැකි බවත් එබැවින් වගකීමෙන් එම අවස්ථාව භාවිත කරන ලෙසත් ය.
