ගෙවී ගිය දින දහයක් තුල දුම්රිය දෙපාර්තමේන්තු ශ්‍රේණි පහක් සිදුකළ වැඩවර්ජනය නිසා දුම්රිය දෙපාර්තමේන්තුවට රුපියල් කෝටි පහළොකවකට අධික මුදලක් අහිමි වී තිබෙන බව දුම්රිය තාක්ෂණ ශිල්පී සංගමය සඳහන් කරයි.
වැටුප් විෂමතාවක් මුල්කර ගනිමින් මෙම වෘත්තීය ක්‍රියාමාර්ග සිදුකරන බවත්, අදාළ ගැටලුවලට විසඳුම් ලබාදීම කැබිනට් මණ්ඩලයේ හා පාලකයන්ගේ ප්‍රධානම වගකීමක් බවත් එම සංගමයේ ප්‍රධාන ලේකම් එම්.ඒ. රත්නසිරි මහතා පැවසීය.
වැඩවර්ජනයේ නිරත සේවකයන් නියෝජනය කරන ශ්‍රේණිවලට අමතර තම සේවාව ඇතුළු බොහෝ ශ්‍රේණිවලට විශාල ගැටලු ප්‍රමාණයක් ඇති වී තිබෙන බවත්, එහෙත් පාලකයන්, බලධාරීන් ඒ පිළිබඳ කිසිදු සොයාබැලීමක්වත් සිදුනොකරන බවත් හෙතෙම පවසා සිටියේය.
දුම්රිය වැඩවර්ජනය නිසා දෛනිකව දුම්රිය දෙපාර්තමේන්තුවට අය විය යුතු ප්‍රවේශපත්‍ර ගාස්තු, භාණ්ඩ හා තැපැල් ප්‍රවාහන ගාස්තු, ආපන ශාලා ගාස්තු, තෙල් ප්‍රවාහන දුම්රියන්වලට ලැබෙන ආදායම් සම්පූර්ණයෙන්ම අහිමි වී ගොස් තිබෙන බවත්, මීට අමතරව මේ මාසයට අදාළ වාර ප්‍ර‘වේශපත්‍ර නිකුත් කිරීමද ඇනහිට තිබෙන බවත් ප්‍රධාන ලේකම්වරයා සඳහන් කළේය.
