පාස්කු ඉරුදින ප්‍රහාරය පිළිබඳ ජනාධිපති පරීක්ෂණ කොමිෂන් සභාවේ අවසන් වාර්තාවේ වෙළුම් 87න් 22ක් (ග්‍රන්ථ 22ක්) කොමිසමේ උපදෙස් පරිදි නීතිපතිවරයා වෙත නොදුන් බවට නීතිපතිවරයාගේ මාධ්‍ය සම්බන්ධීකරණ නිලධාරිනි අධිනීතිඥ නිශාරා ජයරත්න මෙනවිය පවසයි.

ජාතික ආරක්ෂාවට සම්බන්ධ සංවේදී තොරතුරු ඇතුළත් වෙළුම් 22ක් එලෙස භාර දී නොමැති බව ඇති අතර ඊයේ (02) නීතිපතිවරයා වෙත භාරදී ඇත්තේ ජනාධිපති කාර්යාලය වෙත භාර දී තිබූ අවසන් වාර්තාවේ සම්පූර්ණ වෙළුම් 65 ක් (ග්‍රන්ථ 65ක්) පමණි.

නීතිපතිවරයා පෙන්වාදෙන්නේ ප්‍රහාර මාලාවේ සැකකරුවන්ට එරෙහිව ඉදිරි නීතිමය ක්‍රියාමාර්ග ගැනීම කඩිනම් කළ ද ඊට සැළකිය යුතු කාලයක් ගතවිය හැකි බවයි.

අධිනීතිඥ නිශාරා ජයරත්න මෙනවිය වැඩිදුරටත් මෙසේ කීය. “මෙම පරීක්ෂණ සභාවේ උපදෙස් පරිදි ජාතික ආරක්ෂාවට සම්බන්ධ සංවේදී තොරතුරු ඇතුළත් විලුම් 22ක් නීතිපතිවරයාට භාර දී නොමැත. නඩු පැවරීම සඳහා බෝම්බ ප්‍රහාර 8ට අදාළව දහස් ගණනකින් සමන්විත විමර්ශන උදෘතයන් සහ කොමිෂන් සභාවේ පිටු 30,000කට අධික සාක්ෂි සටහන් සහ පාර්ලිමේන්තු කාරක සභාවේ සටහන් අධ්‍යයනය කර විමර්ශන සිදු කිරීමට ඇති අවශ්‍යතාව ද සලකා වගකිවයුතු සැකකරුවන්ට විරුද්ධව චෝදනා ඉදිරිපත් කිරීම කාර්යක්ෂමව සහ කඩිනමින් සිදු කරන බවත්, කෙසේ වුවද සාමූහික කර්තව්‍ය සඳහා සැලකිය යුතු කාලයක් ගත විය හැකි බවද නීතිපතිවරයා දන්වා සිටී”.