කොරියානු තානාපති කාර්යාලයේ අනුග්‍රහය ඇතිව පොලිස් නිලධාරීන්ට කොරියානු භාෂා පුහුණු වැඩසටහනක් ආරම්භ කර තිබේ.
එහි සමාරම්භක වැඩසටහන ශ්‍රී ලංකාවේ කොරියානු තානාපති Woon Jin Jung මහතාගේ සහ පොලිස්පති සී.ඩී. වික්‍රමරත්න යන මහත්වරුන්ගේ ප්‍රධානත්වයෙන් පොලිස් මූලස්ථාන සම්මන්ත්‍රණ ශාලාවේදී අද (10) පැවති බව පොලිස් මාධ්‍ය කොට්ඨාශය සඳහන් කළේය.
කොරියානු භාෂා පුහුණුව පාඨමාලාවක් ලෙස ජාතික පොලිස් අභ්‍යාස ආයතනය මගින් පැවැත්වීමට නියමිතව ඇති අතර ඒ සඳහා දේශකයන් ඇතුළු පහසුකම් සියල්ලක්ම කොරියානු තානාපති කාර්යාලය මගින් සපයනු ලබයි.
කොරියානු භාෂා පොත්කට්ටල ද මෙහිදී පාඨමාලාව හදාරන නිලධාරීන්ට නොමිලයේම ලැබෙන අතර එය සංකේතවත්කරමින් පොත් කට්ටලයක් අද කොරියානු තානාපතිවරයා විසින් පොලිස්පතිවරයාට ලබාදුන්නේය.
කොරියානු තානාපති කාර්යාල නිලධාරීන් පොලිස් සහයක සේවා ජ්‍යෙෂ්ඨ නියෝජ්‍ය පොලිස්පති සජීව මැදවත්ත, ජාතික පොලිස් විද්‍යා පීඨයේ නියෝජ්‍ය පොලිස්පති ප්‍රියන්ත චන්ද්‍රසිරි ඇතුළු පාඨමාලාව හැදෑරීමට එක්ව සිටින පොලිස් නිලධාරීන් 48 දෙනෙකු මෙම අවස්ථාවට එක්ව සිටියහ.
