ජනාධිපති ගෝඨාභය රාජපක්ෂ මහතාගේ ශක්තිමත් නායකත්වය යටතේ ශ්‍රී ලංකාව තුල කොරෝනා වසංගතය ප්‍රතිපලදායි ලෙස පාලනය කර ඇති බවත් ඉදිරියේදී අවශ්‍ය ඕනෑම මොහොතක ශ්‍රී ලංකාවට ඕනෑම ආකාරයක සහයෝගයක් ලබාදීමට චීනය ඉදිරිපත්වන බවත් චීන ජනාධිපති ෂී ජින් පිං මහතා අවධාරණය කර සිටී.
ඊයේ (13) රාත්‍රියේදී ජනාධිපති ගෝඨාභය රාජපක්ෂ මහතා සමග සිදුකළ දුරකථන සංවාදයකදී චීන ජනාධිපතිවරයා මේ බව ප්‍රකාශ කළ බව Xinhua ප්‍රවෘත්ති සේවය වාර්තා කර සිටී.
කොරෝනා වෛරසය වැළැක්වීම සහ පාලනයකිරීම මෙන්ම රටේ විවිධ ක්ෂේත්‍රවල සිදුකෙරෙනා සංවර්ධන කටයුතු යලි ආරම්භ කිරීමද මේ මොහොතේ කල යුතු බවත් , එහිදී ශ්‍රී ලංකාව සමග එක්ව ශ්‍රී ලංකාවට අවශ්‍ය ආධාරද ලබාදෙමින් එම කටයුතු ක්‍රියාත්මක කිරීමට බලාපොරොත්තුවන බවත් චීන ජනපතිවරයා මෙහිදී සඳහන් කර ඇත.
කොරෝනා වෛරසයට එරෙහිව චීනය මුහුණදී තිබු තීරණාත්මක මොහොතක ශ්‍රී ලංකා සමාජයේ විවිධ කොටස් තම රටට ලබාදුන් ක්‍රියාකාරී සහය සම්බන්ධයෙන් චීන ජනාධිපතිවරයා මෙහිදී කෘතවේදීත්වය පළකර ඇත.
වසංගත සමයේදී තම පුරවැසියන් රැකබලා ගැනීම පිළිබඳවචීන ජනාධිපතිවරයා මෙහිදී ශ්‍රී ලංකා රජයට සහ ජනතාවට ස්තූතිය පුද කළ අතර, තම රටේ සිටින ශ්‍රී ලාංකික පුරවැසියන්ගේ ආරක්ෂාව සහ සෞඛ්‍යය සහතික කිරීම සඳහා සිය රජය අඛණ්ඩව කටයුතු කරන බවට සහතික කොට තිබෙන බවද වාර්තා වේ.
