දම්පත් රණසිංහ
චෝදනා එල්ලවී ස්ථාන මාරුවක් ලැබූ ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා සම්බන්ධයෙන් විමර්ශනයක් පවත්වන ලෙස පොලිස්පති සී.ඩී. වික්‍රමරත්න මහතා විසින් පොලිස් විශේෂ විමර්ශන ඒකකයට දැනුම් දී සතියකට වැඩි කාලයක් ගතවී ඇතත් මෙතෙක් නිසි විමර්ශනයක් ආරම්භවී නැති බව වාර්තා වේ. රත්නපුර කිරිඇල්ල මාර්ගයේදී පුද්ගලයෙකුට අමානුෂික ලෙස පහරදීමක් සම්බන්ධයෙන් මෙම විමර්ශනය ඇරඹුණි.
පහරදීමෙන් පසු තමාව බලහත්කාරයෙන් රැගෙන ගොස් කිරිඇල්ල පොලිස් ස්ථානයේ රදවාගෙන තවත් පොලිස් නිලධාරීන් තිදෙනෙක් ඉදිරියේදී නිරුවත්කර කාමරයක දණගස්වා ඡායාරූප පවා ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා විසින් ලබාගත් බවට පහරකෑමට ලක්වූ පුද්ගලයා විසින් නීලකන්දන් සහ නීලකන්දන් නීති සමාගම මගින් ජනාධිපතිවරයාව දැනුවත්කමින් පෙරේදා ලිපියක් ද යොමුකර ඇත. ඒ වන විට රන්මල් කොඩිතුවක්කු මහතාගේ මුවින් මත්පැන් ගද වහනය වූ බවද එහි සදහන්ය. අවසානයේදී සිය සේවා දායකයාව කිරිඇල්ල ග්‍රාමීය රෝහලටරැගෙන ගොස් වෛද්‍යවරයාට බලපෑම්කර පොලීසිය තුළදී පහරදීමක් සිදු ව නොමැති බවට වාර්තාවක්ද සකස්කරගෙන ඇති බවද එම ලිපියෙහි සදහන්ය.
පිටුහයකින් සමන්විත එම ලිපියෙහි තවදුරටත් සදහන් වන්නේ ලබාගත් නිරුවත් ඡායාරූප සමාජ මාධ්‍ය ඔස්සේ ප්‍රචාරයකර නින්දා අපහස කරන බවට පවා සිය සේවා දායකයාට තර්ජනය කර ඇති බවය.
ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා සම්බන්ධයෙන් මේ වන විට පොලීසිය ගෙන ඇති උපරිම ක්‍රියාමාර්ගය වී ඇත්තේ ඒ වන විට ඔහු දැරූ සබරගමුව පළාත්භාර පොලිස් ප්‍රධානියා තනතුරින් ඉවත්කර පොලිස් රෝහල සහ සුබසාධන අංශයේ ප්‍රධානියා ලෙස පත්කිරීම පමණි.
විමර්ශන ගොනුවක් පමණක් විවෘත කර ඇති අතර එය මේ වන විට විශේෂ විමර්ශන ඒකකයේ ඇත. එහෙත් අඩුම තරමින් මෙම සිදුවීමට භාජනය වූ පුද්ගලයාගෙන් හෝ පහරදීම වූ ස්ථානයට හෝ විශේෂ විමර්ශන ඒකකයේ නිලධාරීන් ගොස් නැතැයි සඳහන් ය.
