ප්‍රබෝධා හෙට්ටිආරච්චි
අවුරුදු 16ට අඩු දරුවන් රැකියාවන්හි යෙදවීම තහනම් කර නව නීති රීති ඇතුළත් පනත් කෙටුම්පත් හතරක් පාර්ලිමේන්තුවේදී සම්මත වී තිබේ.
කම්කරු අමාත්‍ය නිමල් සිරිපාල ද සිල්වා මහතා විසින් මෙම පනත් කෙටුම්පත් මැතිසබයට ඉදිරිපත් කර ඇත.
මෙම පනත් කෙටුම්පත් පිළිබඳ දෙවැනි වර කියැවීමේ විවාදය අරඹමින් කම්කරු ඇමැති නිමල් සිරිපාල ද සිල්වා මහතා පැවැසුවේ මෙරට දරුවන්ගේ ආරක්ෂාව තහවුරු කිරීම සඳහා මෙම නව නීති හඳුන්වා දෙන බවයි.
මේ පනත් හතර සම්මත වූ පසුව මේ රටේ අවුරුදු 16ට අඩු කිසිම දරුවකු රැකියාවන්හි යෙදවීම දඬුවම් ලැබිය හැකි වරදක් වන බවද ඇමැතිවරයා කීය.
ශ්‍රී ලංකාව ජාත්‍යන්තර සම්මුති අනුව කටයුතු කිරීම ඉතා වැදගත් බව කී සිල්වා මහතා ළමා ශ්‍රමය පාවිච්චි කිරීම සියයට බිංදුවක් දක්වා අඩුකර ගැනීම රජයේ ඉලක්කයයි.
පාසල් වේලාවට පෙර හා පසුව මවුපියන්ගේ කෘෂිකාර්මික කටයුතුවලට උදව් වීමටත් වෘත්තීය පුහුණු පාඨමාලාවක් හැදෑරීමටත් එම දරුවන්ට නව නීතිවලින් බාධාවක් ඇති නොවේ.
මෙවැනි නීති රීති ක්‍රියාත්මක කිරීම මගින් ජී.එස්.පී. ප්ලස් වැනි සහන ලබාගත හැකිවනු ඇතැයි ද එහිදී අවධාරණය කෙරිණ.
