ශ්‍රී ලංකාවේ වෛද්‍ය සංගම් ඒකාබද්ධව රජයට ඉදිරිපත් කල ලිපියේ අඩංගු යෝජනා වහා ක්‍රියාත්මක කිරීම අතිශය වැදගත් බව රජයේ වෛද්‍ය නිලධාරීන්ගේ සංගමය අවධාරණය කර සිටී .
“සංචරණ සීමා පැනවීමේ වැදගත්කම එම ලිපිය හරහා පෙන්වාදී ඇති බවත් . එම සීමා පැනවීම ජනගනත්වය සහ විද්‍යාත්මක පදනමක් මත සිදුවිය යුතු බවද එම සංගමයේ විධායක සභික වෛද්‍ය ප්‍රසාද් කොළඹගේ මහතා මාධ්‍ය වෙත පැවසීය .
මේ වනවිට කොරෝනා ව්‍යාප්තිය ඉතා බරපතල මට්ටමක පවතින බවත් එය කිසිසේත් සුළුවෙන් නොතකන ලෙසත් කොළඹගේ මහතා මෙහිදී පැවසීය.
රෝගය පැතිරයාම ක්‍ෂණිකව පාලනය නොකළහොත් ඒ සඳහා වියදම් ද ඉදිරියේදී බරපතල ලෙස ඉහළ යනු ඇතැයි වෛද්‍ය සංගම් විසින් ජනාධිපතිවරයාට යොමුකළ ලිපියේ දැක්වේ.
ශ්‍රී ලංකා වෛද්‍ය සංගමයේ සභාපති විශේෂඥ වෛද්‍ය පද්මා ගුණරත්න, රජයේ වෛද්‍ය නිලධාරීන්ගේ සංගමයේ සභාපති විශේෂඥ වෛද්‍ය අනුරුද්ධ පාදෙණිය, විශේෂඥ වෛද්‍යවරුන්ගේ සංගමයේ සභාපති විශේෂඥ වෛද්‍ය ලක්කුමාර් ප්‍රනාන්දු, ශ්‍රී ලංකා වෛද්‍ය සංගමයේ අන්තර් විද්‍යාල කමිටුව වෙනුවෙන් මහාචාර්ය තමසි මකුළොලුව යන මහත්ම මහත්මීන්ගේ අත්සනින් එම ලිපිය යොමුකර ඇත.
