හිමාල කඳුකරයේ චීන ඉන්දියා දේශ සීමාවේදී චීන හමුදා භටයන් සමග ඇති වූ ගැටුම්කාරී තත්ත්වයෙන්
අවම වශයෙන් ඉන්දීය සොල්දාදුවන් 20 දෙනෙකු මියගොස් ඇති බව ඉන්දීය හමුදාව පවසයි.
මතභේදයට තුඩුදුන් අක්සායි චින්-ලඩාක් ප්‍රදේශයේ ගැල්වාන් නිම්නයේදී මෙම ගැටුම හටගෙන ඇති අතර,
දේශසීමාවේ දෙපස විශාල හමුදා ගොඩනැගීමක් සිදුවෙමින් පැවතීම මෙම ගැටුමට හේතුව බව කියැවෙයි.
සොල්දාදුවන් තිදෙනෙකු මියගොස් ඇති බව ඉන්දීය හමුදාව මීට පෙර පවසා තිබුණද,
බරපතල ලෙස තුවාල ලැබූවන් 17 දෙනෙකු සෘණ උෂ්ණත්වයක් පවතින ප්‍රදේශයක ඊට නිරාවරණය වීමෙන් ඔවුන්ගේ ජීවිතද අහිමිව ඇති බව කියයි.
වසර 40 කට වැඩි කාලයක් තිස්සේ දෙරටේ මතභේදාත්මක දේශ සීමාව තුළ සිදු වූ පළමු වැනි හමුදා මරණ මෙම සිදුවීම බව කියැවෙයි.
දෙපාර්ශවයේම ජ්‍යෙෂ්ඨ හමුදා නිලධාරීන් මේ වනවිට තත්ත්වය සමනය කිරීම සඳහා රැස්වී සිටින බව වාර්තා වෙයි.
