අමාත්‍ය චමල් රාජපක්ෂ මහතා ඝාතනය කරන බවට තර්ජනය කරමින් කෙටි පණිවුඩ යැවූ පුද්ගලයා පොලීසියේ සහ ත්‍රිවිධ හමුදාවේ උසස් නිලධාරීන් සිය දෙනෙකුට පමණ මෙලෙස තර්ජනාත්මක පණිවුඩ යවා ඇතැයි අනාවරණය වී තිබේ.
බස්නාහිර පළාත් අපරාධ කොට්ඨාශය විසින් මෙම තොරතුරු අනාවරණය කරගෙන ඇත.
දුරකථන මගින් දිගින් දිගටම කෙටි පණිවිඩ යැවීම හේතුවෙන් මෙම පුද්ගලයා ඊයේ අත්අඩංගුවට ගෙන තිබුණි.
එහිදී අනාවරණය වී තිබුණේ විසි නව හැවිරිදි මොහු රාජගිරියේ රාජගිරිය ප්‍රදේශයේ පුද්ගලික රෝහලක ආරක්ෂක නිලධාරියකු ලෙස සේවය කරන බවයි.
කලක් මහණ වී සිටි මොහු දේශපාලන පක්ෂයකට ළැදිව ක්‍රියා කරන්නෙකි.
පිහි ඇනුමක් මගින් චමල් රාජපක්ෂ ඇමතිවරයා ඝාතනය කරන බවට සඳහන් පණිවුඩ මෙසේ යවා ඇත.
උසස් නිලධාරීන්ට, ඉහළ පෙළේ පුද්ගලයන්ට මෙලෙස තර්ජනාත්මක පණිවිඩ යැවීම පිටුපස කිසියම් බලවේගයක් ක්‍රියාත්මක ද යන්න පිළිබඳ පොලිසිය විමර්ශන අරඹා තිබේ.
