බොදුබලසේනා සංවිධානයේ මහ ලේකම් ගලගොඩඅත්තේ ඥානසාර හිමියන්ට ප්‍රමාණවත් ආරක්ෂාවක් ලබාදෙන ලෙස අපරාධ වින්දිතයන් හා සාක්ෂිකරුවන් ආරක්ෂා කිරීමේ අධිකාරියට නියෝග කර තිබේ.
එම නියෝගය කරන ලද්දේ පාස්කු ඉරිදා ත්‍රස්ත ප්‍රහාරය සම්බන්දයෙන් කරුණු සොයා බලන ජනාධිපති කොමිසම විසිනි.
ඒ ඥානසාර හිමියන්ට ජීවිත තර්ජන ඇති බවත් උන්වහන්සේට ලබාදී තිබුණු පොලිස් ආරක්ෂාවද පසුගිය කාලයේ ඉවත්කර ඇති බවත් කොමිසමේදී අනාවරණය විමෙන් පසුවය.
තුන්වැනි දිනටත් ඊයේ (18) ගලගොඩඅත්තේ ඥානසාර හිමියන් පාස්කු කොමිසම හමුවේ දීර්ඝ ලෙස සාක්ෂි ලබා දුන්හ.
සාක්ෂි විභාගය රාත්‍රී 10.30 පමණ වනතුරු පැවැතුණි.
කොමිසම හමුවේ උන්වහන්සේ විසින් වහබ්වාදය සහ අන්තවාදී සංවිධාන සහ පුද්ගලයින් සම්බන්ධයෙන් කළ හෙළිදරව් සහ උන්වහන්සේට ඇති ජීවිත තර්ජනයන් ගැන සලකා බලා කොමිසම විසින් මෙම නියෝගය කළේය.
