තමන් රාජ්‍ය බුද්ධි සේවයේ අධ්‍යක්ෂකවරයාව සිටි සමයේ දේශපාලන පක්ෂ 2ක් රට පාලනය කළ බැවින් එය අමතර පීඩනයකින් රාජකාරි කිරීමට හේතුවූ බව රාජ්‍ය බුද්ධි සේවයේ හිටපු අධ්‍යක්ෂ ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන මහතා පවසයි.
හෙතෙම මේ බව කියාසිටියේ පාස්කු ප්‍රහාරය සම්බන්ධයෙන් කරුණු සොයා බලන ජනාධිපති කොමිසම හමුවේ ය.
එම පක්ෂ දෙකෙහි දර්ශන පිළිබද ගැටළු පවා තිබුණු බවද ඔහු කොමිසමට කීය.
පැවැති රජයේ ඇමතිවරුන් ගැන පවා වාර්තා තමන් විසින් අවශ්‍ය තැන්වලට ඉදිරිපත් කළ බවත් තමාගේ බුද්ධි වාර්තා දේශපාලනඥයන්ට උවමනා ලෙස වෙනස් නොකල බවත් නිලන්ත ජයවර්ධන මහතා පැවැසීය.
2017 වසරට වඩා 2018 වසරේ රටේ ජාතික ආරක්ෂාව සම්බන්ධයෙන් වූ තත්වය වෙනස්ව පැවැති බවද ඔහු සදහන් කළේය.
එකල නීතිය හා සාමය අමාත්‍යාංශය පැවැතියේ ආරක්ෂක අමාත්‍යාංශය යටතේ නොවන බැවින් තමාට නීතිය හා සාමය අමාාත්‍යවරයා විසින් ඉල්ලා සිටින වාර්තා පවා ලබාදීමට සිදුවුණු බවත් ඒ සියල්ලක්ම ලබාදුන්නේ ආරක්ෂක ලේකම්වරයාගේ අනුමැතිය ඇතිව බවත් නිලන්ත ජයවර්ධන මහතා සදහන් කළේය.
තමා අවශ්‍ය කරුණු දෙපැත්තටම දැනුම්දුන් බවද ඔහු වැඩිදුරටත් සදහන් කළේය.
