* දෛනික මරණ – ආසාදිතයින් ඉහළට
* අදම බූස්ටර් ගන්න
අසංක නවරත්න
පසුගිය වසරේ නොවැම්බර් මාසයෙන් පසු මෙරට තුළ ඊයේ (31) වනවිට Covid-19 ආශ්‍රිත මරණ 32 ක් දක්වා සීග්‍ර ලෙස ඉහළ තිබේ.
සෞඛ්‍ය සේවා අධ්‍යක්ෂ ජනරාල්වරයා තහවුරු කළ පරිදි පෙරේදා දින එම කොවිඩ් මරණ සිදුව තිබුණි.
ඒ අනුව ශ්‍රී ලංකාවෙන් වාර්තා වූ මුළු Covid මරණ සංඛ්‍යාව ඊයේ 15,473 දක්වා ඉහළ ගොස් තිබේ.
2021 නොවැම්බර් මාසයෙන් පසු දිනක් තුළ වාර්තා වූ වැඩිම Covid මරණ සංඛ්‍යාව මෙයයි.
මීට පෙර නොවැම්බර් 22 වැනිදා කොවිඩ් මරණ 31ක් වාර්තා විය.
එතැන් පටන් කොවිඩ් මරණ සංඛ්‍යාව තනි ඉලක්කම දක්වා පවා අඩුවෙමින් පැවතුනි.
කෙසේ වෙතත්, පසුගිය සතියේ සිට, දිනකට මරණ 20 කට වඩා වාර්තා වීමත් සමඟ සංඛ්‍යාව වැඩි වී තිබේ.
මේ අතර ඊයේ දිනයේ කොවිඩ් ආසාදිතයින් අඛණ්ඩව තෙවැනි දිනටත් දහස ඉක්මවමින් 1137 දෙනෙකු වාර්තා වී තිබේ.
මිලියන 10ක් පමණ දෙනා තවමත් බූස්ටර් එන්නත් මාත්‍රාව නොගැනීම මෙම තත්ත්වයට බලපා ඇති බව සෞඛ්‍ය අංශ අදහසයි.
මේවනවිට වේගයෙන් පැතිරෙන ඔමික්‍රෝන් ප්‍රභේදයෙන් ආරක්ෂා වීමට හැකි ඉක්මනින් බූස්ටර් මාත්‍රාව ලබාගන්නා ලෙස සෞඛ්‍ය අංශ ජනතාවට බල කර සිටී.
