ජනාධිපති ගෝඨාභය රාජපක්ෂ මහතාට සහ එම ආර්යාවට කටුනායක ජාත්‍යන්තර ගුවන් තොටුපළේ සිට දිවයිනෙන් බැහැරව මාලදිවයින බලා පිටත්ව යාමට ගුවන් යානයක් අද අලුයම ලබාදුන් බව ශ්‍රී ලංකා ගුවන් හමුදාව නිවේදනයක් නිකුත් කරමින් පවසයි.
ශ්‍රී ලංකා ආණ්ඩුක්‍රම ව්‍යවස්ථාවේ විධායක ජනාධිපතිවරයෙකුට හිමි බලතල ප්‍රකාරව පවතින රජයේ ඉල්ලීමට අනුව ආරක්ෂක අමාත්‍යංශයේ පූර්ණ අනුමැතියට යටත්ව එය සිදුකෙරුණු බව එම නිවේදනයේ දැක්වේ.
ජනාධිපති ගෝඨාභය රාජපක්ෂ මහතා අද(13) අලුයම ගුවන් හමුදා ගුවන් යානයකින් අසල්වැසි මාලදිවයින බලා පිටත්ව ගිය බව AFP ප්‍රංශ පුවත් සේවය වාර්තා කර තිබුණි.
ජනාධිපතිවරයා ඉල්ලා තිබූ අමෙරිකානු වීසා ප්‍රතික්ෂේප වී ඇති බව ද හින්දු පුවත්පත ඊයේ වාර්තා කළේය.
ජනාධිපති ගෝඨාභය රාජපක්ෂ මහතාට සහ බැසිල් රාජපක්ෂ මහතාට ශ්‍රී ලංකාවෙන් පිටතට යාමට ඉන්දියාව පහසුකම් සලසා දුන් බවට පළ වූ වාර්තා ඉන්දීය මහ කොමසාරිස් කාර්යාලය ප්‍රතික්ෂේප කරමින් ට්විටර් පණිවිඩයක් තබා තිබේ.
