රජ පවුල විවේචනය කරමින් ආන්දෝලනාත්මක සම්මුඛ සාකච්ඡාවකට සහභාගී වීමේ උණුසුම මුළුමනින්ම පහව යන්නටත් පෙර හැරී කුමරු සිය මුත්තනුවන් වූ එඩින්බරෝ ආදිපාද පිලිප් කුමරුගේ අවමංගල්‍යයට සහභාගී වීම සඳහා බ්‍රිතාන්‍යයට පැමිණෙන බවට තහවුරු කර තිබේ. ඒ බිරිඳ මේගන් මාකෙල් නොමැතිව තනිවම ය.
අපේ‍්‍රල් 17 වන සෙනසුරාදා සිය සීයාගේ අවමංගල්‍ය උත්සවයට සහභාගී වීම සඳහා එක්සත් රාජධානියට ආපසු ඒම ගැන හැරී සිය පවුලේ අය සමඟ සාකච්ඡා කළ බව ආරංචි මාර්ග පවසයි.
ඔහු පවසා ඇත්තේ සෑම කෙනෙකු සමඟම සිටීමට තමාට අවශ්‍ය බවත් ඒ වන විටත් ඔහු නිවසට පැමිණීමට කටයුතු සූදානම් කරමින් සිටින බවත්ය.
පවුල හැරගිය ද සසෙක්ස් ආදිපාද හැරී කුමරු ඔහුගේ ඥාති සහෝදරියන් වන බියට්‍රිස් කුමරිය සහ ඉයුජීනී කුමරිය මෙන්ම ඔහුගේ පියා වන චාල්ස් කුමරු සමඟ ද සම්බන්ධ වී ඇති බවට වාර්තා ඇත.
COVID-19 පැතිරීම මැඩපැවැත්වීම සඳහා ගමන් සීමාවන් සහ දැඩි නිරෝධායන නීති ක්‍රියාත්මක වන විට, ආදිපාදවරයාට දින පහක් ස්වයං හුදකලා වී පීසීආර් පරීක්ෂණයක් කිරීමට සිදුවනු ඇත.
පීසීආර් වාර්තා ඍණාත්මක නම්, නිරෝධායනය බිඳ දමා ඔහුගේ පවුලේ අය සමඟ සිටීමට ඔහුට ඉඩ සලසනු ඇත.
ගැබ්ගෙන සිටින මේගන් මාකෙල් වෛද්‍යවරුන්ගේ උපදෙස් පරිදි එඩින්බරෝ ආදිපාදවරයාගේ අවමංගල්‍යයට සහභාගී නොවන බව බකිංහැම් මාලිගයේ ප්‍රකාශකයෙක් සෙනසුරාදා තහවුරු කළේය.
