ලොව පුරා , විද්‍යාව හා ඉංජිනේරු තාක්ෂණයට අදාළ නව පර්යේෂණයන් සිදුකිරීම, සීග්‍ර ලෙස වර්ධනය වෙමින් ඇති බවත්, ඒ අතරින්ද ලොව සියලු රටවල් අභිබවා ඉදිරියටම පැමිණීමට චීනය සමත්ව ඇති බවත් ඇමෙරිකානු විද්‍යා පදනම මගින් නිකුත් කල නවතම වාර්තාවක දැක්වේ.
පසුගිය 2018 වසරේ පමණක් විද්‍යාත්මක හා ඉංජින්රු තාක්ෂණයට අදාළ නව පර්යේෂණ වාර්තා 25 ,55959 ක ප්‍රමාණයක් ප්‍රකාශයට පත්ව ඇති අතර , එය මීට දශකයකට පෙර ප්‍රකාශයට පත්වූ පර්යේෂණ වාර්තා ප්‍රමාණයට සාපේක්ෂව සියයට 30 ක පමණ වර්ධනයක් වන බවද ඇමෙරිකානු විද්‍යා පදනම සඳහන් කර සිටී .
චීනය එම 2018 වසර තුල නව පර්යේෂණ වාර්තා 528263 ක් ප්‍රකාශයට පත්කර ඇති අතර එය ලොව පුරා ප්‍රකාශයට පත්කරන ලද පර්යේෂණ වාර්තා සංඛ්‍යාවට සාපේක්ෂව සියයට 20 කට අධික ප්‍රමාණයකි. එසේම පසුගිය දශකය තුල , චීනයේ මෙම නව පර්යේෂණ අංශය වාර්ෂිකව සියයට 8 කින් වර්ධනය වී ඇති බවද වාර්තාවේ.
2018 වසරේ දෙවනියට වැඩිම නව පර්යේෂණ ප්‍රමාණයක් සිදුකර ඇත්තේ ඇමෙරිකාව වන අතර එරට නිකුත් කර ඇති පර්යේෂණ වාර්තා සංඛ්‍යාව 422808කි . එසේම මෙම ලයිස්තුවේ තෙවැනි තැන දිනාගැනීමට ඉන්දියාව සමත්ව ඇති අතර එරට එම වසරේ නිකුත් කර ඇති පර්යේෂණ වාර්තා ප්‍රමාණය 135788 කි .
සමස්තයක් ලෙස ලොව පුරා මෙම නව විද්‍යාත්මක පර්යේෂණ වාර්තා ප්‍රකාශයට පත්වීම වසරක් පාසා සියයට 4කින් වර්ධනය වන බවද ඇමෙරිකානු විද්‍යා පදනම පෙන්වා දී ඇත.
