පවතින අයහපත් කාලගුණික තත්වය හේතුවෙන් දැඩිලෙස පීඩාවට පත්ව සිටින , ගම්පහ , ගාල්ල හා මාතර දිස්ත්‍රික්කවල ජනතාව වෙත සහන සැලසීම සඳහා , ශ්‍රී ලංකා රතුකුරුස සමාජය , රුපියල් මිලියන 140කට අධික මූල්‍යමය වටිනාකමකින් යුත් විශේෂ වැඩසටහනක් ආරම්භ කර ඇත .
මෙම ආපදා සහන වැඩසටහන හරහා , අදාළ දිස්ත්‍රික්ක තුනෙහි , පවුල් 3000කට පමණ අයත් පුද්ගලයින් 15000කට පමණ සහන සැලසීම , ශ්‍රී ලංකා රතු කුරුසයේ ඉලක්කය හා අපේක්‍ෂාව වී ඇත .
පීඩාවට පත් ජනතාව වෙත මූල්‍යාධාර ලබාදීම , අත්‍යාවශ්‍ය බඩු භාණ්ඩ ලබාදීම , මෙන්ම , වෛද්‍යාධාර හා ප්‍රථමාධාර ලබාදීම , පානීය ජල සැපයුම් හා සනීපාරක්‍ෂක තත්වයන් ඉහල නැංවීමට පියවර ගැනීම , පිරිසිදු කිරීමේ ව්‍යාපෘති , වියලි ආහාර බෙදාදීම , පාසල් පොත් පත් හා උපකරණ බෙදාදීම ඇතුළු කටයුතු රැසක් මෙම වැඩසටහනට ඇතුලත්ව ඇති බව ශ්‍රී ලංකා රතු කුරුසයේ ජ්‍යෙෂ්ඨ උප සභාපති ජගත් අබේසිංහ මහතා මාධ්‍ය වෙත පැවසීය .
හදිසි ආපදා ප්‍රතිචාර අරමුදල (Disaster Response Emergency Fund ) ,යටතේ ක්‍රියාත්මක මෙම විශේෂ වැඩසටහන , ජාත්‍යන්තර රතුකුරුසයේ හා ජාත්‍යන්තර අඩසඳ සමාජයන්ගේ සහය ඇතිව ක්‍රියාත්මක කර ඇති බවත් , මාස හතරක කාලාසීමාවක් පුරා මෙම ආධාර වැඩසටහන දියත් කරන බවත් , අබේසිංහ මහතා පැවසීය .
මෙම වැඩසටහන දැනටමත් අදාළ දිස්ත්‍රික්ක තුනෙහිම සාර්ථකව ක්‍රියාත්මකවෙමින් ඇති අතර එළඹෙන පෙබරවාරිය වන විට වැඩසටහනේ සියලු ඉලක්ක සපුරාලීමටද නියමිතව ඇත .
මෙම ආපදා සහන වැඩසටහනේ විවිධ කොටස් ගැන වැඩිදුරටත් පැහැදලි කරමින් ජගත් අබේසිංහ මහතා මාධ්‍ය වෙත මෙසේද පැවසීය ,
මූල්‍යාධාර බෙදාහැරීමේ වැඩසටහන හරහා පවුල් 1900 ක , පුද්ගලයින් 9500කට සහන සැලසීමට නියමිතයි . එසේම මෙහිදී පුද්ගලයින් 50000කට පමණ අත්‍යාවශ්‍ය භාණ්ඩ බෙදාදීමට කටයුතු කරනවා . එසේම වෛද්‍ය කඳවුරු හරහා 40000කට අධික පිරිසකට වෛද්‍යාධාර ලබාදීමට සැලසුම් කර තිබෙනවා . මෙහිදී විශේෂයෙන් වැඩිමහල් පුද්ගලයින්ට හා නිදන්ගත රෝග සහිත පුද්ගලයින්ට විශේෂ අවධානයක් යොමුකෙරෙනවා .
පානීය ජල සැපයුම් හා සනීපාරක්‍ෂක වැඩසටහන් හරහා 14000 කට අධික පිරිසකට සෙත සැලසීමට සැලසුම් කර තිබෙනවා . එසේම පාසල් ළමුන් 4000කට අධික සංඛ්‍යාවකට පාසල් පොත් පත් හා උපකරණ ලබාදෙමටද මෙම වැඩසටහන යටතේ සැලසුම් කර තිබෙනවා . වියලි ආහාර බෙදාදීමේ වැඩසටහනක්ද මීට සමගාමීව ක්‍රියාත්මක කෙරෙනවා.
