දම්පත් රණසිංහ
බෙල්ලන්විල විහාරස්ථානයේ වලාකුළු බැම්ම අසල තිබී අත්බෝම්බයක් ඊයේ (13) හමුවී තිබේ. ඉටි බෑගයක දමා එම බෝම්බය කිසියම් අයෙක් විසින් එම ස්ථානයේ දමා ගොස් ඇතැයි පොලීසිය සැකකරයි.
මෙම බෝම්බය මුලින්ම දැක ඇත්තේ විහාරස්ථානයේ සේවකයින් දෙදෙනකි. ඔවුන් විසින් පොලීසිය දැනුවත් කිරීමෙන් අනතුරුව විශේෂ කාර්ය බලකා බෝම්බ නිෂ්ක්‍රීය අංශය කැදවා එය ආරක්ෂිතව පුපුරවා හැර නිෂ්ක්‍රීය කර තිබේ. මේ පිළිබඳ පුළුල් විමර්ශනයක් පැවැත්වීමට පොලීසිය කටයුතු කරයි.
නාරාහේන්පිට පිහිටි ලංකා රෝහලේ පළමු මහලේ වැසිකිළියක තිබී මදුරු දඟරයක් අලවා පුපුරායාමට සලස්වා තිබූ අත්බෝම්බයක් හමුවූයේ මීට හරියටම මාසයකට පෙර ය. එම සිද්ධිය සම්බන්ධයෙන් මේ වනවිට බෝම්බය ඇටවූ පුද්ගලයා ඇතුළුව කිහිපදෙනකු අත්අඩංගුවට ගෙන සිටී. ඔවුන්ගෙන් ඇතැමෙක් හිටපු එල්ටීටීඊ සාමාජිකයන් ය.
