විදෙස්


Share now!

බ්‍රසීලයේ විපක්ෂ විරෝධතාකරුවන් පිරිසක් පසුගිය සති අන්තයේ රජයේ ගොඩනැගිලි කඩා බිඳ දමා අභ්‍යන්තර විනාශයක් සිදු කිරීමට හැකි වූයේ කෙසේද යන්න ප්‍රශ්න කරමින්, එරට වත්මන් ජනාධිපති ලුයිස් ඉනාසියෝ ලූලා ද සිල්වා රටේ ආරක්ෂක අංශ වෙත චෝදනා නගා තිබේ.

“බ්‍රසීලියා පොලීසිය මෙම තර්ජනය නොසලකා හැරියා. බ්‍රසීලියා බුද්ධි අංශ එය නොසලකා හැරලා” ලූලා සඳුදා ආණ්ඩුකාරවරුන් සමග පැවති රැස්වීමකදී පැවසීය.

“පොලිස් නිලධාරීන් ප්‍රහාරකයන් සමග කතා කරමින් සිටින ආකාරය දැකිය හැකියි. පෙළපාලිකරුවන්ට පොලිසියේ පැහැදිලි අනුග්‍රහයක් තිබුණු බව පෙනෙනවා” ඔහු පැවසීය. එමෙන්ම විරෝධතාකරුවන්ට මුදල් සැපයුවේ කවුරුන්ද යන්න සොයා බලන බවද ඔහු සපථ කළේය.

අන්ත දක්ෂිණාංශික හිටපු ජනාධිපති ජෙයාර් බොල්සොනාරෝට සහාය දක්වන විරෝධතාකරුවන් ඉරිදා ශ්‍රේෂ්ඨාධිකරණය, ජනාධිපති මන්දිරය සහ කොංග්‍රසය වටලා, වසර 12ක විරාමයකින් පසු නැවත බලයට පත් වූ ලූලා ද සිල්වා හමුදාවට මැදිහත් වී නෙරපා හරින ලෙස ඉල්ලා සිටියේය. පසුගිය ඔක්තෝම්බර් මාසයේදී බොල්සොනාරෝට එරෙහිව ඔහු ජනාධිපතිවරණය ජයග්‍රහණය කළේය.