ජනාධිපතිවරණය අනිවාර්යෙන්ම නොවැම්බර් 15 වෙනිදාත් දෙසැම්බර් 07 වෙනිදාත් අතර කාලය තුළ පැවැත්වෙන බවත් ඉදිරි ජනාධිපතිවරණයේදී යොදා ගැනීමට සිදුවන්නේ 2018 ඡන්ද හිමි නාම ලේඛනය බවත් මැතිවරණ කොමිසමේ සභාපති මහින්ද දේශප්‍රිය මහතා සදහන් කළේය.
රාජගිරියේ පිහිටි මැතිවරණ කොමිසම් සභාවේ ශ්‍රවනාගාරයේදී අද (22) පැවැති ප්‍රවෘත්ති සාකච්ඡාවකදී සභාපතිවරයා ඒ බව සදහන් කළේය.

මේ දිනවල 2019 ඡන්ද හිමි නාම ලේඛනය සකස් කිරීමේ කටයුතු සිදුවෙමින් පවතින බැවින් එය සැත්තැම්බර් 30 වෙනිදා වන විට සහතික කිරීමට බල පොරොත්තු වන බව මහින්ද දේශප්‍රිය මහතා අපේක්ෂා කළේය. ඉදිරි ජනාධිපතිවරණය ලබන නොවැම්බර් 15 වෙනිදාත් දෙසැම්බර් 07 වෙනිදාත් පැවැත්වීමට අපේක්ෂාකාරන බැවින් 2019 ඡන්ද හිමි නාමලේඛනය යොදා ගැනීමට නොහැකිවනු ඇතැයි ඔහු පෙන්වා දුන්නේය. සැත්තැම්බර් 20 ත් ඔක්තෝම්බර් 20 ත් අතර නාමයෝජනා භාරගැනීමට හැකිවනු ඇතිබවට විශ්වාසයද ඔහු පලකරනු ලැබීය.

ඡන්දහිමි නාම ලේඛනය සෑම වර්ෂයකම ජුනි 01 වෙනිදා අවසන් කළ යුතුව ඇතත් එම කාල වකවානුවේදී ගංවතුර නියං ඇතුළු ස්වභාවික විපත් වලට මුහුණ දෙන්නට සිදුවන බැවන් ග්‍රාමසේවා නිලධාරීන්ට එහිදී සුභසාධන කටයුතුවලට මුල්තැන දීමට සිදුවන බැවින් සෑම වර්ෂයකම නොසිතූ ලෙස ඡන්ද හිමි නාම ලේඛනය අවසන් කිරීමේ කටයුත්ත ප්‍රමාද වන බවද ඔහු පෙන්වා දුන්නේය. ඡන්ද හිමි නාම ලේඛනයේ නම නොමැතිනම් ඡන්දය නොමැති බවද ඔහු අවධාරණය කළේය.