පාතාල නායක හා මත්කුඩු ජාවාරම්කාර මාකදුරේ මධූෂ්ගේ දියණියගේ උපන් දින සාදයේ ඩුබායි පොලීසිය විසින් අත්අඩංගුවට ගත් පිරිස අතර මත්ද්‍රව්‍ය භාවිත කර ඇති 31 දෙනකු මේ වනවිට හදුනාගෙන ඇතැයි එරටින් ලැබෙන ආරංචි මාර්ග අනාවරණය කරයි.
එම සාදයට සහභාගි වූ සියයකට ආසන්න පිරිසක් එදින ඩුබායි පොලීසියට හසුවී තිබුණි.
ඒ අයගෙන් මත්ද්‍රව්‍ය චෝදනා එල්ල නොවන සෙසු පිරිස ඉදිරි දින කිහිපය තුළ මෙරටට පිටුවහල් කර එවීමට නියමිත ය.
මත්ද්‍රව්‍ය භාවිත කළ බවට රුධිර පරීක්ෂාවෙන් අනාවරණය වූ 31 දෙනා මෙරට ඔවුන්ගේ ඥාතීන්ට දුරකතනයෙන් කතාබහ කිරීමට ඊයේ අවස්ථාව ලබාදී තිබුණි.
එරටින් ලැබෙන තොරතුරුවලට අනුව දැනගන්නට ඇත්තේ මොවුන් අනිද්දා අධිකරණයට ඉදිරිපත් කොට චෝදනා ඉදිරිපත් කිරීමට සූදානම් බවයි.
මධූෂ් වෙනුවෙන් පමණක් එරට නීතිඥයින් සමාගමක නීතිඥයින් 11 දෙනෙක් ඉදිරිපත් වී සිටින බව වැඩිදුරටත් එම තොරතුරු අනාවරණය කළේය.
ගයාන් කුමාර වීරසිංහ
