බංග්ලාදේශය ද මේවනවිට මූල්‍ය අර්බුදයකට මුහුණ දෙමින් ඇතැයි ඉන්දීය මාධ්‍ය වාර්තා කරනවා. ආර්ථික විශේෂඥයින් උපුටා දක්වමින් එම වාර්තා පෙන්වා දෙන්නේ පසුගිය මාස 03 තුළ බංග්ලාදේශයේ ටකා මුදල් ඒකකය අමෙරිකානු ඩොලරයට සාපේක්ෂව සියයට 20 කින් පමණ පහත වැටී ඇති බවයි.
පවතින තත්ත්වය හමුවේ බංග්ලාදේශය ජාත්‍යන්තර මූල්‍ය අරමුදලෙන් සහය ඉල්ලා ඇති බවද ඉන්දීය මාධ්‍ය වාර්තා කරනවා. යුක්රේන යුද්ධය හමුවේ ඉන්ධන මිල ගණන් ඉහළ යාම වැනි කරුණු හේතුවෙන් බංග්ලාදේශය ද දැඩි අර්බුදයකට මුහුණපාමින් ඇති බවයි වාර්තා කරන්නේ.
දේශීය මුදලේ අගය අවප්‍රමාණය වීම සහ විදේශ විනිමය සංචිත අඩුවීම හේතුවෙන් බංග්ලාදේශය මුහුණ පා සිටින බලශක්ති හිඟයත් සමඟ විදුලිබල සැපයුමට ද දැඩි පීඩනයක් එල්ල වෙමින් ඇතැයි වාර්තා වනවා. එය ලිහිල් කිරීම සඳහා වායු සමීකරණ භාවිතය සීමා කරන ලෙස බංග්ලාදේශ රජය එරට මුස්ලිම් පල්ලිවලට දැනුම්දී ඇති බවයි වාර්තා වන්නේ.
පවතින තත්ත්වය අනුව බංග්ලදේශය, ණය මාර්ගයකට යොමුවීම සඳහා ජාත්‍යන්තර මූල්‍ය අරමුදලට ඉල්ලීම් ඉදිරිපත් කර ඇති බව ද ඉන්දීය මාධ්‍ය වාර්තා කරනවා. එහෙත් එහිදී අපේක්ෂිත ණය මුදල කොපමණද යන්න අනාවරණ කර නැහැ.
